Борисо-Глебский монастырь

1.jpg2.jpg4.jpg

ОБЪЯВЛЕНИЕ
Если у Вас сохранились старинные фотографии и другие материалы, имеющие отношение
к Борисо-Глебскому мужскому монастырю, Троице-Борскому девичьему монастырю,
с.Кондаково и колодчику
прп. Иринарха, а также другим селам и храмам
Борисоглебской земли, просим обратиться по адресу

Этот адрес электронной почты защищен от спам-ботов. У вас должен быть включен JavaScript для просмотра.

Свидетельства о помощи преп. Иринарха

Вадим, 35 лет
Добрый день, святые отцы!
Хочу предоставить свидетельство о заступничестве святого
24.03.2013

Наши друзья

Канон Пресвятой Богородицы «Казанская»

КАНОН ПРЕСВЯТЫЯ БОГОРОДИЦЫ

В ЧЕСТЬ ИКОНЫ ЕЯ «КАЗАНСКАЯ»

глас 4

Песнь 1

Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса.

ПРИПЕВ: Пресвятая Богородица, спаси нас.

Благоговеют Ти, Богородице, Ангелов начальницы, и святых чини честно служат, праведнии красуются, Небесных Ходатаицу блажат Тя, купно же и земля и Небо в веселии светло восхваляют Тя, и мы, грешнии, милости просим: озари наша сердца, Владычице, воспети песнь святыя Твоея иконы явлению.

Пресвятая Богородица, спаси нас.

Приидите, соберитеся, христоименитии людие, умы тайно очистившеся, во святую церковь Матере Христа Бога нашего, источает бо нам неоскудно от святыя иконы источник духовен, целебен душам и телом, песнь вопиющим: благословен из Тебе рождейся Бог наш.

Пресвятая Богородица, спаси нас.

Дивит, Пренепорочная, и ужасает всяк слух странно чудо Божественнаго Твоего рождества: Херувимскаго Творца зачала еси! Како Огнь нестерпимый во утробе носила еси! Како сущую Жизнь плотию облекла еси и Живот всему миру родила еси, Бога купно и Человека!

Пресвятая Богородица, спаси нас.

Под кров Твой, Дево Госпоже, прибегаем, вси роди человечестии, просвети нас светом Рождества Твоего, грешныя рабы Твоя, молящияся прилежно и кланяющияся пречистей Твоей иконе, просяще от Тебе прияти великия милости.

Песнь 3

Ирмос: Твоя песнословцы, Богородице, Живый и Независтный Источниче, лик себе совокупльшия, духовно утверди, в Божественней Твоей славе венцев славы сподоби.

Пресвятая Богородица, спаси нас.

Кую Ти достойную похвалу наше принесет конечное неможение, яко явлением пречистыя Твоея Божественныя иконы независтныя источники целебныя источаеши верно прибегающим к Тебе рабом Твоим?

Пресвятая Богородица, спаси нас.

Божественныя Твоея иконы святое явление, Богородице Дево, яко светозарное возсия нам солнце, преславных чудес лучи пущающи, тьмы лютых обстояний отгоняющи священными Твоими, Владычице, предстательствы.

Пресвятая Богородица, спаси нас.

Исполнила еси благодати иногда первописанную Твою икону, Госпоже Дево Богородице, и ныне таже благодать истинствует сиянием веры чудес, яко Тоя ради первописанныя, ко спасению верно к Тебе по Бозе прибегающим.

Пресвятая Богородица, спаси нас.

Покланяемся, Богородице, Твоему пречистому образу и пресладкому Твоему Младенцу, превечному и незаходимому Свету Христу, Имже спасла еси от лютых зол и тления смертнаго все человеческое естество.

Песнь 4

Ирмос: Седяй в Славе на Престоле Божества во облаце легце, прииде Иисус Пребожественный Нетленною Дланию и спасе зовущия: слава, Христе, силе Твоей.

Пресвятая Богородица, спаси нас.

Почтим, людие, чистыя в чистоте икону Девы Богородицы и Тоя Божественнаго Младенца, Христа Бога нашего, и лобызаем, и прославляем со страхом и трепетом: почитаем бо икону благочестно, паче же почитаем Самую Тую сущую Чистую Богоматерь.

Пресвятая Богородица, спаси нас.

Давид Божественный и чудный пророк, издалеча провидя, глагола: лицу Твоему помолятся богатии людие. Мы же, вернии, покланяемся и лобызаем честную икону, душами купно и телесы освящаемся.

Пресвятая Богородица, спаси нас.

Евангелия Христова богогласный списатель Лука Божиим мановением всенепорочный Твой написует образ, Богородице, и Младенца Превечнаго на руках Твоих вообразив, к немуже притекающия напастей и бед избавляеши, и вся покрываеши, и спасаеши Твоею милостию.

Пресвятая Богородица, спаси нас.

Ты еси похвало и венец святым всем, о Царице, Ты упование наше и Помощнице по Бозе, и на Тя надежду спасения нашего возложихом вси. Тебе молимся, яко Божии Матери: одожди грешным рабом Твоим богатыя Твоя душеспасительныя милости.

Песнь 5

Ирмос: Ужасошася всяческая о Божественней славе Твоей: Ты бо, Неискусобрачная Дево, имела еси во утробе над всеми Бога и родила еси Безлетнаго Сына, всем воспевающим Тя мир подавающая.

Пресвятая Богородица, спаси нас.

Всяко, Пречистая, существо воспети недоумеет Тя: паче бо Горних умов превозвысилася еси, рождши неприступнаго и страшнаго Всецаря и Бога. Но яко милостива и скорая человеком Помощница, вонми молению раб Твоих и даруй Твою помощь.

Пресвятая Богородица, спаси нас.

Идеже осенит благодать Твоя, Богородице, страхом исчезают демони и разрушается злокозненное тех мечтание, бегают дуси темнии, радуется же верных все множество, Тебе песнь хвальну от сердца вопиюще; радуйся, Божественный покрове душ наших.

Пресвятая Богородица, спаси нас.

Безочесным сладкое зрение дается, глухим слышание, немым благоглаголание, хромым хождение, прокаженным очищение, демонствуемым целомудрие и в болезнех сущим различных исцеление, осенением пречистыя Твоея, Богородице, иконы.

Пресвятая Богородица, спаси нас.

Не умолчим никогдаже, Богородице, псалмы и песньми воспевати величия Твоя, Обрадованная: Бога бо воистину воплотившагося родила еси во спасение наше всемирное и избавление.

Песнь 6

Ирмос: Божественное сие и всечестное совершающе празднество, Богомудрии, Богоматере, приидите, руками восплещим, от Нея рождшагося Бога славим.

Пресвятая Богородица, спаси нас.

Божественнаго Твоего Рождества, Дево Госпоже, пребогатая благодать, юже древле изглашением предала еси пречистому Твоему образу, неоскудне действовати великая же и преславная, во спасение на Тя надеющимся.

Пресвятая Богородица, спаси нас.

Идеже прославляется святое имя обрадованныя Богородицы, тамо всяческих благих источницы проливаются; приидите в чистоте, человецы, се бо явлением Божественныя Девы иконы сказует Царицы пришествие, во спасение всех верных.

Пресвятая Богородица, спаси нас.

Целения болезней, отгнание же страстей и душепитательное спасение, грехов прощение и вечное избавление от пречистыя Твоея иконы, Владычице, верно приходяще, приемлем, Богомати Всенепорочная.

Пресвятая Богородица, спаси нас.

К Тебе, Госпоже, прибегают роди правоверных, просят великия милости и приемлют неоскудно сущии в недузех исцеление, в страстех пременение, в печалех утешение; источи мне, Владычице, каплю душеспасительную, да со всеми и аз пою Твое величие.

Кондак, глас 8

Притецем, людие, к тихому сему и доброму пристанищу, скорой Помощнице, готовому и теплому спасению, покрову Девы, ускорим на молитву и потщимся на покаяние: источает бо нам неоскудныя милости Пречистая Богородица, предваряет на помощь и избавляет от великих бед и зол благонравныя и богобоящияся рабы Своя.

Икос

Смысл очистивше и ум, притецем к Богородице, светло песньми ублажающе Ю, и пречистую икону Ея прославляем и чтим и, припадающе, покланяемся, яко Самой, сущей оной: честь бо иконы на первообразное восходит, и почитаяй и покланяяйся ей почитает самое первообразное, якоже Божественнии отцы рекоша. И аще кто не чтит Пресвятыя Богородицы и не покланяется иконе Ея, анафема да будет: посрамляет бо и погубляет не чтущия Ю, избавляет же от великих бед и зол благонравныя и богобоящияся рабы Своя.

Песнь 7

Ирмос: Не послужиша твари Богомудрии паче Создавшаго, но, огненное прещение мужески поправше, радовахуся, поюще: препетый отцев Господь и Бог, благословен еси.

Пресвятая Богородица, спаси нас.

Приидите, почерпем отпущение от неистощимаго источника, точащаго святыню, Пречистыя Девы, и Тоя Пречистаго Младенца, Божия Слова, нас ради вочеловечшагося. К Немуже возопиим: Творче, Избавителю препрославленный со Отцем и Духом, Боже, благословен еси.

Пресвятая Богородица, спаси нас.

Неусыпную, Чистая, и Богоприятную имущи молитву и непреодолеемую державу крепости, врагов наших дерзость, яже на ны, разори, и выя их под нозе верному воинству нашему низложи, да возвеселимся о Тебе, раби, Сыну Твоему вопиюще: отец наших Боже, благословен еси.

Пресвятая Богородица, спаси нас.

Радуемся и веселимся, вернии людие, чудному явлению иконы Пречистыя Владычицы Богородицы: река бо явися неисчерпаема, целебную воду точащи, слепым бо видети дает, и глухим слышание, хромым хождение и всем, сущим в недузех, безмездно исцеление.

Пресвятая Богородица, спаси нас.

Неиспытана глубина, недоведомо таинство, непостижим образ, Дево, зачатия Твоего, зачатие без семене, без мужа рождество, Безплотный воплотися, Превечный младенствует, Сын Божий Сын Тебе, Девы, бывает. Емуже вопием: Боже, благословен еси.

Песнь 8

Ирмос: Отроки благочестивыя в пещи Рождество Богородичо спасло есть, тогда, убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.

Пресвятая Богородица, спаси нас.

Ум Ангельский и человеческий ужасается, Богородице: како Бога Небеснаго, ложеснами объемши, воплотила еси? Како, Младенца рождши, яко Сына на руку носиши? Егоже ужасается тварь и трепещут горнии престоли, вопиюще непрестанно: Свят, Свят, Свят еси, Боже, препетый и превозносимый во веки.

Пресвятая Богородица, спаси нас.

Радуйся, сущая радосте всего мира, со Архангелом Гавриилом вопием Ти, Богородице. Радуйся, вместилище Невместимаго. Радуйся, Благодатная, носило Божества всего. Радуйся, Адамово воззвание, с Тобою Господь и Тебе ради с нами, спасая нас. Егоже поем и превозносим во веки.

Пресвятая Богородица, спаси нас.

Корень Иессеев освященный, корень греха нашего исторгнула еси, жезл Ааронов процветший, Жизнодателя цвета израстивши Христа, стамно манноприемная, смерти всю силу сокрушила еси и в породу жизни возвела еси род человеческий, темже Тя поем, добрых виновную.

Пресвятая Богородица, спаси нас.

Ты похвала христианом еси, Владычице, Ты оружие на враги и стена к Тебе прибегающим. Тя и ныне на помощь призываем, Госпоже: не даждь врагом вознестися на люди Твоя, иже Тебе не хвалят, ни Сына Твоего, Богородице, и Твоей иконе не кланяются, сих победи и души наша спаси.

Песнь 9

Ирмос: Всяк земнородный да взыграется, Духом просвещаемь, да торжествует же Безплотных умов естество, почитающее священное торжество Богоматере, и да вопиет: радуйся, Всеблаженная Богородице, Чистая Приснодево.

Пресвятая Богородица, спаси нас.

Тебе, твердую Помощницу роду человеческому, Богородице Марие, лик пророческий многообразно провозвести: сень святую, небес пространнейшую, скрижаль Богописанную и купину неопалимую, дверь Богопроходную, гору же и лествицу, и мост, и жезл процветший, мы же воистину Богородицу Тя величаем.

Пресвятая Богородица, спаси нас.

Тайна глубины рождества Твоего ум ангельский ужасает, Дево, и пречистая икона демоны прогонит, и лица нечестивых омрачает, и в студ поревает: не терпят бо взирати на силу ея, бегают же и исчезают. Мы же любезно покланяемся и лобызаем и Тя, Богородицу, величаем.

Пресвятая Богородица, спаси нас.

Предстательница сущи неотступна к Вышнему Царю, яко имущи Матерне дерзновение непостыдно, в мире глубоце православных житие утверди, и отечество наше возвыси, и вся полезная даруй всегда рабом Твоим, да Тя, Богородице, величаем.

Пресвятая Богородица, спаси нас.

О всемилостивая христианом Помощнице! Не может Тя воспети достойно ум человеческий и ангельский, яко всея твари честнейши, Небесных и земных славнейши: всех бо родила еси Творца и Бога. Но, о Владычице, приими милостивно, юже Тебе от сердца возложихом песнь, спасай нас всегда, на Тя бо надеемся.

Светилен

Да почтится всепетая Мати Божия, Жизнь сущую рождши, Христа Бога нашего, райских дверей отверзение и всего мира очищение, к Животу возведение. Сей есть пророки глаголавый, Тому поклонимся, Богу и Спасу душ наших.

Канон преподобному. Иринарху

КАНОН
ПРЕПОДОБНОМУ ИРИНАРХУ,
ЗАТВОРНИКУ РОСТОВСКОМУ

Тропарь, глас 4:

Яко мученика добропроизвольна и преподобных удобрение,/ звезду Ростовскую,/ в затворе, узах и веригах Господеви благоугодившаго/ и чудес благодать от Него приемшаго,/ Иринарха предивнаго песньми хвалебными почтим/ и к нему припадающее, умильно глаголем:/ отче преподобне, моли Христа Бога/ спастися душам нашим.

Песнь 1

Ирмос: Море огустил еси,/ погрузивый со оружием гордаго фараона,/ и люди спасл еси немокренно, Господи,/ и ввел еси я в Гору Святыни, вопиющия:/ поим Тебе, Богу нашему, песнь победную, яко прославися.

Припев: Преподобне отче наш Иринарше, моли Бога о нас.

Моря страстного пучину прешел еси безвредно, преподобне отче,/ и под знаменем креста Христова крепко ратовал еси,/ терпением и смирением невидимыя враги побеждая./ Темже чудес благодатию от Господа прославился еси предивно.

Преподобне отче наш Иринарше, моли Бога о нас.

Морю предел положивый,/ Господь яви тя дивна в терпении и злострадании, Иринарше блаженне,/ подвигом бо новым себе вдал еси,/ любве ради Христовы плоть твою затвором и узами железными изнуряя,/ в нихже дарами духовными прославился еси, пречудне.

Преподобне отче наш Иринарше, моли Бога о нас.

Моря житейскаго треволнение не погрузи корабля твоего душевнаго, Иринарше Богомудре,/ веянием бо Духа Божия управляем, в тихое пристанище вшел еси/ и многими благодатными дарами прославился еси.

Пресвятая Богородице, ebony porn спаси нас.

Тучи слез испроси нам, Владычице Преблагая,/ и теми угаси пещь страстей наших,/ да спасение вечное получим твоим предстательством/ и воспоим Христу победную песнь, яко прославися.

Песнь 3

Ирмос: Утвердися сердце мое во Господе,/ вознесеся рог мой в Бозе моем,/ разширишася на враги моя уста моя,/ возвеселихся о спасении Твоем.

Преподобне отче наш Иринарше, моли Бога о нас.

Утвердил еси на камени терпения сердце твое, преподобне отче,/ и, аки безплотен, всякия скорби, гонения же и злострадания безропотно претерпевал еси,/ на Подвигоположника Христа Бога очима веры взирая./ Темже и о спасении своем возвеселился еси Того Божественною благодатию.

Преподобне отче наш Иринарше, моли Бога о нас.

Утвержденный откровеньми Небесными,/ в затворе многолетне пребыл еси, Иринарше блаженне,/ узами железными связав твое тело,/ раны же тому нещадно возлагая,/ да никакоже возможет востати на дух твой,/ во спасение вечное тобою управляемый.

Преподобне отче наш Иринарше, моли Бога о нас.

Утверждал еси прозорливыми твоими словесы ближния твоя, отче предивне,/ к любве Христовой всех возбуждая,/ еяже преисполнен быв, гонителем твоим кроток и незлобив показался еси,/ о покаянии тех моля Бога.

Пресвятая Богородице, спаси нас.

Утверждение на Тя надеющихся, Богородице Дево,/ не посрами упования нашего, еже по Бозе на Тя возлагаем,/ но буди нам Защитница от нападений вражиих,/ да, Тобою помоществуеми, возвеселимся о спасении нашем.

Седален, глас 4:

Скорый помощник являешися, преподобне отче Иринарше,/ всем, с верою притекающим к честному твоему гробу,/ исцеления болящим подавая от него силою Господа сил,/ прославльшаго тя чудотворения благодатию./ Сего ради с любовию почитаем святую и всечестную память твою.

Песнь 4

Ирмос: Пророк Аввакум умныма очима/ провиде, Господи, пришествие Твое,/ теми и вопияше:/ от юга придет Бог./ Слава силе Твоей, слава снисхождению Твоему.

Преподобне отче наш Иринарше, моли Бога о нас.

Пророком Божиим подобяся, отче Иринарше,/ будущая, яко настоящая, созерцал еси/ и прозорливо предрекл еси имущее быти изгнание ляхов,/ присно умоляя Христа о победе православных/ и воспевая Того Божественное снисхождение.

Преподобне отче наш Иринарше, моли Бога о нас.

Пророчески омывал еси лице твое слезами/ и питие твое плачем растворял еси, преподобне,/ да плачем временным плача вечнаго избегнеши./ Темже блаженство плачущих унаследовал еси на Небесех/ и ныне во Царствии Христа Бога утешаешися,/ воспевая Того Божественное снисхождение.

Преподобне отче наш Иринарше, моли Бога о нас.

Пророка и царя Давида песнопения возлюби душа твоя, преподобне отче,/ имиже Бога день и нощь славил еси,/ и яко птица, особящаяся на зде,/ от затвора твоего уединеннаго благоумиленно песни хвалы и славословия Христу Богу воспевал еси присно,/ Того Божественное снисхождение прославляя.

Пресвятая Богородице, спаси нас.

Пророческая речения на Тебе сбывшася, Дево Богородице,/ Ты бо Слово Божие нетленно воплотила еси/ и Невместимаго во утробе Твоей девственней вместила еси./ Темже и воспеваем спасительное Христово снисхождение.

Песнь 5

Ирмос: Господи Боже наш, мир наш даждь нам,/ Господи Боже наш, стяжи ны,/ Господи, разве Тебе, иного не вемы,/ Имя Твое именуем.

Преподобне отче наш Иринарше, моли Бога о нас.

Господа Бога освятил еси в душе твоей, преподобне отче,/ и, Того Божественною любовию уязвив сердце твое,/ явился еси верный делатель заповедей Христовых,/ во смирении духа выну пребывая/ и в молитвах непрестанных призывая Имя Божие спасительное.

Преподобне отче наш Иринарше, моли Бога о нас.

Господа Бога выну зрел еси очима души твоея, преподобне отче,/ и, страхом Божиим утверждаем, непоколебим от искушений вражиих пребыл еси,/ вся прилоги диавольстии отражая призыванием молитвенным Божественнаго Имене Христова.

Преподобне отче наш Иринарше, моли Бога о нас.

Господень раб был еси, Иринарше преблаженне,/ выну работавый Владыце Христу во смирении и терпении мнозе,/ плоть твою изнуряя затвором тесным и веригами тяжкими,/ яки вси, зрящии таковое твое страдальческое житие,/ Имя Христово прославляху.

Пресвятая Богородице, спаси нас.

Господня Мати и Владычице всея твари явилася еси, Богородице Марие, рождши Единаго от Троицы, Бога Слова./ Егоже моли, Чистая, страстей безсловесных нас избавити,/ да в тишине безстрастия сердцем и усты воспеваем святое Имя Его.

Песнь 6

Ирмос: Яко воды морския, Человеколюбче,/ волнами житейскими обуреваюся./ Темже, яко Иона, тако вопию Ти:/ возведи от тли живот мой, Благоутробне Господи.

Преподобне отче наш Иринарше, моли Бога о нас.

Яко верный последователь Христа Бога,/ смирен и незлобив был еси, Иринарше преблаженне,/ моляся выну за враги и гонители твоя./ Молим тя, преподобне,/ научи и нас твоему непамятозлобию/ и ко Христу путеводи нас молитвами твоими,/ да не погибнем в бездне греховней.

Преподобне отче наш Иринарше, моли Бога о нас.

Яко безплотен воистину, отче,/ всякое злострадание телесное терпел еси мужески, утеснитель быв твоему телу,/ еже железными узами неослабно истнил еси,/ да от бездны греховныя изыдет живот твой.

Преподобне отче наш Иринарше, моли Бога о нас.

Яко крепкий ратоборец, в доспехи железныя одеявся, преподобне,/ враги невидимыя побеждал еси/ и, вся искушения диавольская отражая,/ воистину был еси столп непоколебим благочестия и подвижник совершенный о Христе,/ в немже тля греховная никакоже обретеся.

Пресвятая Богородице, спаси нас.

Яко воистину прибежище непостыдное христианом, щит и покров, Мати Божия,/ воспевающия Тя бед и скорбей свободи./ Тя бо Едину, благословенную в женах, немолчными песньми хвалебными ублажаем.

Кондак, глас 2:

Волнений множество жестоким житием преходя,/ изгнание, затвор и узы железныя претерпел еси мужески, Иринарше терпеливодушне,/ нам оставль образ злострадания и терпения твоего,/ озаряя чудес блистаньми с верою приходящих к честному гробу твоему,/ у него же, яко почесть победную вериги твоя тяжкия видим,/ от них же подаеши исцеления недужным./ Сего ради зовем ти:/ радуйся, Иринарше, отче предивный.

Икос:

Ангельскими нравы себе благоукрасив, Иринарше блаженне,/ тих, кроток и незлобив был еси./ В земном житии ко врагом твоим не враждуя,/ но присно моляся за них Богу,/ воистину Небесный человек показался еси/ и совершенный угодник Христов,/ Им бо в житии и по преставлении чудесы многими прославлен был еси, преподобне./ Ты и ныне точиши исцеления от мощей твоих,/ к нимже с верою и любовию притекающе, вопием ти:/радуйся, Иринарше, отче предивный.

Песнь 7

Ирмос: Халдейская пещь, огнем паспалаемая,/ орошашеся Духом Божиим предстоянием,/ отроцы пояху:/ благословен еси, Боже отец наших.

Преподобне отче наш Иринарше, моли Бога о нас.

В пещи многих искушений, Иринарше блаженне,/ терпеливо пребывал еси, не опален уныния пламенем,/ и вся прилоги диаволи смирением и незлобием души твоея низложил еси, присно зовый:/ благословен еси, Боже отец наших.

Преподобне отче наш Иринарше, моли Бога о нас.

В пещи гонения лютаго,/ яко сребро чистое, пред лицем Божиим явился еси, преподобне отче,/ сего ради Ангела Божия сподобился еси зрети, да выну поеши:/ благословен еси, Боже отец наших.

Преподобне отче наш Иринарше, моли Бога о нас.

Пещь многих скорбей разже ти диавол, Иринарше терпеливодушне,/ неразумныя на тя человеки воздвизая,/ но вся сия незлобием твоим посрамил еси/ и, присно моляся за них Богу взывал немолчно:/ благословен еси, Боже отец наших.

Пресвятая Богородице, спаси нас.

В пещи халдейстей таинство рождества Твоего проразумевая, Богородице,/ рождшимся от Тебе Искупителем спасение обретохом/ и, подобно отроком Богословцем, Сыну Твоему и Господу благодарно зовем:/ благословен еси, Боже отец наших.

Песнь 8

Ирмос: Ангели и Небеса,/ на Престоле Славы Седящего/ и яко Бога непрестанно Славимаго,/ благословите, пойте/ и превозносите Его во веки.

Преподобне отче наш Иринарше, моли Бога о нас.

Ангела тя во плоти и человека Небеснаго видев,/ воевода рати иноплеменныя ублажи терпение твое и мужество души твоея, отче преподобне, глаголя,/ яко таковаго отца никогдаже виде,/ и тако прослави Бога, препетаго и превозносимаго во веки.

Преподобне отче наш Иринарше, моли Бога о нас.

Ангелы собеседники имел еси, преподобне отче,/ и теми укрепляем, гонение лютое претерпел еси мужески,/ гонителем же твоим благотворити тщался еси,/ присно моляся за них Богу, препетому и превозносимому во веки.

Преподобне отче наш Иринарше, моли Бога о нас.

Ангелов Творец, Христос Господь, обетования Своя на тебе исполни, Иринарше, отче наш,/ и яко претерпевшему до конца всякое злострадание/ прозорливства и чудотворения дарова тебе благодать,/ еюже зело прославил еси на земли Бога, препетаго и превозносимаго во веки.

Пресвятая Богородице, спаси нас.

Ангельское целование приносим Ти с любовию, Богородице Чистая, глаголя:/ радуйся, Благодатная, Господь с Тобою./ Ты же радости Небесныя сподоби по долгу Тя ублажающия/ и от Тебе рождшагося славящия Бога препетаго и превозносимаго во веки.

Песнь 9

Ирмос: Чужде матерем девство,/ и странно девам деторождение:/ на Тебе, Богородице,/ обоя устроишася./ Тем Тя, вся племена земная,/ непрестанно величаем.

Преподобне отче наш Иринарше, моли Бога о нас.

Чужд был еси всякаго лукавства, отче, и толико кроток и незлобив,/ яко дивитися учеником твоим, видящим тя, среди лютаго гонения мирно пребывшаго духом/ и гонители твоя, яко благотворцы, почитавшаго,/ на нихже не гневался еси,/ но присно величал еси Христа Жизнодавца.

Преподобне отче наш Иринарше, моли Бога о нас.

Чужеземцы ляхи, зряще подвиги твоя великия, преподобне отче, умилишася/ и, яко угодника Божия, тя почитаху,/ тебе ради не расхищая обители твоея святыя./ Ты же им небоязненно правду Божию вещал еси,/ присно величая Христа Жизнодавца.

Преподобне отче наш Иринарше, моли Бога о нас.

Чужд покоя в затворе твоем был еси, отче Иринарше, рукама твоима одежды сшивая и ими нищия одевая,/ и во устех молитву Иисусову непрестанно имел еси,/ сердцем и усты твоими немолчно величая Христа Жизнодавца.

Пресвятая Богородице, спаси нас.

Чуждых искушений вражеских яви ны, Владычице,/ и в час кончины нашея ускори к нам на помощь, / прием сомолитвенника Твоего за ны , преподобнаго Иринарха,/ умоли же Сына Твоего и Господа избавити души наша от насилия вражия,/ да, спасении Тобою, радостно Тя величаем.

МОЛИТВА

О великий угодниче Христов, добропроизвольный страдальче, предивный затворниче, преславный чудотворче, преподобне отче наш Иринарше! С верою и любовию к тебе припадаем и молимся прилежно: яви нам, смиренным и грешным, молитвенное твое заступление. Се бо, грех ради наших, не имамы свободы чад Божиих просити о потребах наших Господа и Создателя нашего, но тебе предстателя благоприятнаго к Нему предлагаем, и просим тя со усердием многим. Испроси нам у благости Его вся благопотребныя дары душам и телесем нашим: веру праву, надежду спасения несомненну, любовь ко всем нелицемерну, благочестие непоколебимое, во искушениих мужество, в злостраданиих терпение, в молитвах постоянство, душам и телесем здравие, земли плодоносие, воздуху благорастворение, дожди благовременны и благословение свыше на вся благая дела и начинания наша. Испроси, угодниче Божий, у Царя небеси и земли здравие, спасение и на враги одоление, и всему богохранимому Отечеству Российскому мир, тишину и благостроение. Сохрани, чудотворче святый, обитель твою честную, в ней же подвизался еси люботрудно, и вся живущия в ней и на поклонение в ню приходящия невредимы от искушений диавольских и вскаго зла и всем подаждь вся к житию нужная, и кончину христианскую, и добрый ответ на Страшнем Суде Христове; молитвами твоими всех нас приведи во пристанище спасения, и наследники яви быти всесветлаго Царствия Христова, да поем и славим человеколюбие и милость в Троице поклоняемаго Бога, Отца и Сына и Святаго Духа, и твое святое заступление, во веки веков. Аминь.

Иная молитва

О преподобне отче наш Иринарше! Се мы молим тя усердно: буди ходатай наш присный, испроси нам, рабам Божиим (имена), от Христа Бога мир, тишину, благоденствие, здравие, спасение и от всех врагов видимых и невидимых ограждение. Покрый же нас ходатайством твоим от нахождения всяких бед и скорбей, паче же от искушений врага темнаго, да вси мы с тобою прославляем всесвятое имя Отца и Сына и Святаго Духа, ныне и присно и во веки веков. Аминь.

Икона дня

Православие.Ru Официальный сайт Русской Православной Церкви / Патриархия.ru

Православный календарь

Сайт создан
по благословению
епископа Рыбинского
и Угличского
Вениамина

Крестный ход 2016

осталось ... 19.07.2017 8:0 -127 дней

Случайное изображение

10658.d.jpg

Радио Благовещение» слушать онлайн

Яндекс.Метрика
Поиск в православном интернете: